Pänh ööny Ato Omot Ojulu

November 13, 2010 (St. Cloud, MN) - Omot Ojulu, ki jØ paare gi ööi ki Kenya køøt dwädë mo opöödhö may 2010. I jwøk mana pöödhö nïr dwääy 6, 2010 öönyë apänhnhi døc døc ki lam Minnsota. Lwaak mo päl aöö bäät käänynyö manacë.Jiy mo thööth møa näg dëëtgi ngäcgi ko, Omød ki jø tunggi gena cäänö ki yi bëëttö maru Omød, mana bëëdë Gambella(Pääny) jammi, møa tië na beeyø ki møa tïic dëërë na ba beeyø.

Ojulu Owäär, na näg kwääc øtgöör acäänö ki yi nït maru Omød yi tïëc mar øtgöör, man näg da gïn mo dwøng døc mo tïyu wala mo wiilu Omøtti øtgöör mar tier Pääny bärë, ki mana muunygi Dhaa Anywaa ki jöö mo cøøa bäät tïëc na wøp øtgöör ki jiy møa engi tier øtgöör kigi ciel.

Okäc Okwayø, A cäänö ki, kiper gïna tïëcgi kanya bëëtgi na dipööyë ko, Omød na jie ciel. Ni dwøl mana caan dïpööyi Okäc, ni gïn mo beer kere kany ni bëëdö jie en, bee øtgöör. Beer man aai paac ni käära gïn mo ba røp puul jääy, kanyu aay paac, ni bee göör, ni cäng kö¨, ni gööri moø, manynya man näg da thuuri rigi( Doctorine level).

Obäng Okumö, Acäänö ki bëëttö margi ki Omød, kanya bëëtgi øtgöör Gïïwa(Dormitry) Ni ena dhaanhø mo dwøre dïwïnynyö Yi kal mar Gïïwa.

Ni cäng cäänö,kanya bëëdu Omøtti na kwääny wøppe Pääny, ki køny mana kønye dëët jø Gaanen, køør jammi møa wara jwängngi kiper luum käc margi. Ni cääng kö, nou Omød beeye dhaanhø mo ngatta athibel kipera Anywae bëët.

Okoth, Acäänö thøw, man näg Anywae caala obwörë okaac thur meekgi, ni gi jängnga rigi wala ni bee cam mare, ba poot cenge kayø. Ni mare kö, na Anywae dhaanhø mo tïya gïn mo beer kipergi cenggi tïyö ki gïn mo ba beer.

Ocwøør, Abäng,Owäär, ka apoole mo Omød gena cäänö ki luup mo rëëma ec bëët.

Omød (Owitti) Acïppö ki pwøc jï jiy møa jing dwättö mana tïëc, jiy møa cïppö ki muucë. Na dwøk pwøc jï jiy møa nït kar dwättö, ki jïa Anywae bëët. Ena cäänö kiper dwättö mara Anywae bëët, man bëëdë ni røk opängngø en. Nyuudhi aciel na cïbë beeye, ni Liec thööra apotte, ni näg ø ba dwätti, tïmö ni raac kiperø inyïm. Ena cäänö kiper rääc øtjaath,göök mar jiy,ki luup ciik møa nägu ocïp piny møa kooma man näg jiy wala tïc ba cäädhi ki køør ciik, ni beeye gïna dwøng na kännö ki tööc bëët kanyu kööë ni pa jöörögø na caan ciiki. Ena cäänö thøwu man näg jiy nyenggi di møødhø nee gi twöc ni gïna twöönygigø tiere ba lam.

Nyingatbeer Nyijïbi Okwäyø, Acäänö ka anguudï, ni para with dïpööyë, ni u na dïpööyë en, anëënö møn, man näk dagïn maa wiillu Pääny karkanya ca, ki mana tïyugø karkanyeca nø, bëëdëdïi nee cungu päärö kany?

Eni, luup møa cari maal bëët yø, manynya acaara kipergi.

Obuuy Omot is contributor, he can be reach at