Luum Göör

Ki køør acaara mana cïp Adhierø køør juu arieø moa pöödhö kanya cääne kiper luum göör; aana cädö ni dhee da meedø ki nyi mo thiinh.

Kawaane, ngääö ø bëët ni gïn mo bëët u dhaanhø wiile wiilø, beeye göör. Joot göör ki paac pa gïn mo jööt. Ngat mo käla Cudan wala Ithiopia pa gïn mo di caanø jïre këët. Ngääe no thoothi døøc ki man näk mo joot göör ba jööt.

Ki bang jiy moa en Cudan göör pa gïn mo di lägö kigø, bung atut aciel mo yie da øtgöör. Nee göör joot ki jïra ni køøre di caadhø keere. Ki løø Ithiopia joot göör mana dïkwøng tïmö kere jööt mëëth, ba jööt rietgi ba jööt. Luum døøny Køølec ki Yuniböcti beeye iith mo di cwïërö ma athöödhi ba päänge.

Ni göör mar paac bung gïn laara loop kiper nø; a do köö, “a kany ni enø yie en ø mäni ngø ki göör? Poot na bung göör man en paac, ni poot mänøøni ki göör en wala ø köö, “ni bung göör?” Wala bung gwiel mo göödö ki geni; kiper man näk mo göör mar kany göör ka gwiel. Wala beeye kiper mano tïm bëëte marø ni teek kiper mano tïme ni øtø ba løny ki cool jïø? Ni näk beeye luubö gø enø, a wïth juure møøga göötgi nidïï? A Anywaae moa nøk na näk ba pääng yi cenø na nø öö wøk ki Yuniböcti ki dïpölöma wala dïgrëë oløny jïgi nidïï?”

Ki jïra ngati man nø ree dee pëënynyö ni kööe, “naa amäni ngø ki göör wøk kany na näk joot kare diiny døc ki man joodi ki paac.Ki yi cwiir cooth jooda joodø wala wïnynya wïnynyö ni wïth juure känna wøk ki dïpölöma ki dïgrëë ki uut gööri ma teengi teengi. A møø nø, poot cääthgi ki kaa? Wøp kanymør, ø köö, “ni ø døøngngø nø; göör ba løny jïø këët.” A obwöre moa nywölø pööthi, göör ba løny jïgi thuwø? Kanymør ø köö, “ni obwöre poot therø; a moa käri ki køør na näk gi cäädhö cwiicgi poot kär pääng dicängi ni løny jïgi ki man cigi uut gööri moa døøngø?

Bung dhaanhø mo di köömmö røø kiper luum göör ki gïno dwuöe dëëri wala gïno dwuöe kiper jø pøø. Ø jwöngö dïcängi kiper bung akïm ki dïpööy Pochalla wala Aköbö. Anywaa cøø øt jaath Gambëla ka amöölla ni cäädhö ki tiete, ba duuö no thøw ka bøøya kawaane ni kääri ka pëëm. Anywaa di ngeeø ki yie kiper na kere dëëre ngädhö kiper mana bunge gööre mo dïwøng mo ena jïre wala kiper bung pää ma kare mo eno päy kigø kiper wï juure; o teek mana en jïre ocängø cïppø jï Tïgre.

Møøgø bëët nëënö jïïö. Ø köö nidïï cøøn? Da jiy møøk mo pänhnhø ki maal nee møøgø bëët wiilgi jïø? Ki jïra ni beeye øøni ni wiilgø. Ki paac, jø pøø ngäädhø ni da jiy jïwø mo dwuö nø bëëde; ka manøgø en, bung gïr piny mo dagø. Ni näk ma ennøgø nø, ø jwøø ngø? Beeye jwø bëër?

Ki acaara mara, ki jïra ni øøna öö kany kiper jammi arieø. Mana dïkwøng, ni näk mo ngeth dhaanhø løny jïre ki man ngwäät piny ki nyeng gööre, eni do caa øt göör kany en wäät jiyi yie bëët en; o mana näk løny jïre opäärgø. Nee beeye certipiket, dïplöma wala dïgrëë okälgø wøk nee kunynye dëëre kany wala eni cøa paac kigø nee kunynye dëët jø paac. Rietgi, ni näk mo ngeeth dhaanhø okwier ni ba løny jïre ki man ngwäät piny, kany poot ni bääte poot teek en, beeye ki man tïïe ki cäng ki wääre nee jïte ki jammi nee døø paac kigi ni jäbe ki gïr piny mo pïïa piny kigø mo gadhe gadhø kanyo ö bääte no øøc piny kanyo tïme ni tïng ki tëër yi Pactri ba løny jïre këët. Kiper tïï Pactri bung thoretha mo dagø døøc jïre. Anguune ki kwöre mo thööth beeye ngöödö keere.

Ni manøgø, pa mana cääna kiper nø, ngääö ø bëët ni göör beeye cöön pïth mar ööny maal. Paac wala jø pøø okäløgø maal nidïï? Beeye ki ngwøc niøønø kwänynyö kiper na enø yi ngøøm wøk? Na adïëri mare tøør buutø na bäre.

Naa cøøa ri luum göör mar paac nø. Kawaane pa kanya bëëde ni göör di cwïërö ni jøw nyaama nyuu läämmi ni cenø puuth ki thöör køør maanggae këët Gambëëla ni näk pa ki Pochalla wala Aköbö ni luum göör poot teek ka mar dhi jaath. Øt göör mana thiihn tielø ba këël piny kigø këët nø ni näk mo pa Yuniböcti ni kare bäär mëëth ni ciin yi poot na dhööth ki kïc ki nyi kany mo thiinh ki man døøny yie, ba pa døc.

Dhaanhø man thiinh en na nywøl yi beenhø man ni nyään en, ki jïra ni geno coodø ka acïëni. Öölö margi nëëni kere thiinh mëëth ki mar jø bwøth maal nyïmgi. Gïn mängi ki göör do thiinh mëëth ki jïra. Kiper da jiy mo kunynyö dëëtgi.

Ki jïra joot göör jïgi ni jööt, ki bung teek bëëte døøc mo nut; gïn ma gïr jäängö ki jäak akäle. Jääk aö kiper jammi atïmö ni dagø mo di joodø ni jööt ni dhaanhø kär öö kipergi. Teeng ka obwöre moa näk tuunggi ena wøk, kiper mana tïme ni løny ki man jïtgi ki bïri ma kuma ni jööt jaak ni röömi ki dhaanhø mo otïïö ki dwääy aciel bäre; gïn gööde kiper atïmö ni bungö tiere. Kiper Dhaanhø göödö kiper nee jïte ki tïïc nee jïte ki jammi. Ba jammi atïmö ni dagø mo di joodø ni jööt jaak ni dhaanhø kärööl kipergi. Yïïno göönni ngø këët nø? Man nut keere nø beeye ki man ngëëmmi dëëri ki tier warø kare dïpe abïïc, marthøa ma acwiiya mare ena tielø ma akaga odööng wøk na adïcAbaba na wara wär jø majangngire. Nyïï beege ii ni nyaw owii wøk en, kïtta ki dhi cwïïny. Ki bang-gi, geno thum gïn mo raac bung aciel mo nut cøøn. A göör nø, okäl kaa ni näk mo bëëte jööt na ennøgø nø?

Ki banga køny man kuny jiyi moa en wøk doo na gïn mo beer kiper nee teek bëëte man nut tïme ni bungø nee gïna wara mäna Anywaa ki göör na näk mo Okäc tïme ni tøør nee obwöre göötgi ni beer nee kwäängi ni geno jääng nee jïtgi ki maaki mo beyø nee Yuniböcti na näk ciin yie teek nee tïme ni jööt na dee bëëdö.

Ni näk ma ennø gø jø mäna Anywaae ki göör paac, otïme na jøøøe? A jø ba göödö kany en, poode na jøøe? Ki jïra ngati man nø manynyagø nee cäde bäät luubö man. Manynya gø nee dee løøk aciel mo tïmö ni theem. Ni näk mo pa ennøgø nø, tïmö na päänhnha agwäye na köö majangngiri, “ni tïme kare mara lääk. kär näk ma adïëri këët” ni kïc oløny ni muula yi ngøøm.

Pwøc en jïïu,

Man beeye Gami ki yi Auctralia.