Muuy kiper Anywaae mo athøw kiper Ngööm pwo Anywaa, ki mo en Øt tööc , ki irupïjïïc Bäät Piny En

Angø nyë ajeeny winy opëëno inängingø jiy?
Winylul, I dïïri wi Anywaa aper ngø,nyë?
I ööy ki kaae ni gami winywa en?
Thøø käli bäät Anywaa nii käla kaa cøn?

Jiy keri Owïnya paagi jaak obëëde.
Ni di lø ni Winylul, Winyopëëno,Winytier gool, Winytier ciiru ki Winy pokeedi.
Angø Ajeeny , I ööy powa Anywaa ni käla thøw jiy angø?
Ajeeny bee ïïni oööy ki jø athebeli mowa wal I nït cøn kari ni bëëdø en, këël ri cwiiri bëët ri kwac wa?
Angø nyë Ajeeny, Anywaa päängigø angø?

Ni nyingi omøt, no Ojulu, no obööngö, ni nyingiew, no Othøw ni caam, no Akøth ,ni Nyigwøø, na Ajwaatø, no Okëëlö thuwø.

Wøp nø ni näk omøt,…..ewa nää I ba raany wa nø? Ba no thøw Ajeenyi man ni nyingnge omøt en, ojulu opiew, abäng, powa Änywaa odöönge ji nga?
Aaa , kare møn, powa Anywaa dööng ji James, ki Biranu ki Thøløca, ki Melkaamu , ki Lamabëëbö ki Gar wech, ki John ge ki Gietawun,  ki Mengictu køøre ki ageera yiee.

Angø nyë Ajeeny, I dïïri wï Anywaa ni rii ba nyoothi na kare angø en? Wang ki ïth, ki cenø, ki uum keri cwøla ri dëël.
I møn e, I käli kaa, I ba käl naam wännø?
Wal I duny wøk ki I lul. Ajeeny weny naam wïny man. Ajeeny weny lul wïny gïn.
Wøp kari joot-nee bee ïïna Akööbö, Alwøru, cïïru, wal ïïno opëëna dwøng, a kara gïn mo beer kare. Näm mooi bëët ni powa Anywaa en näkwa nääö ni wïth wa nee wääw nø.  Ba ni näk wa opëënø,Alwørø,Obööth ,Ciiru, ka Akööbö –wïï dïdø.  Ba powa Anywaa odöönge mïërö këët ki naam nga? Jøw lwøgø ya Baay wal cwøw bïththø Langaanø?

Angø nyë Ajeeny ,Ajeeny, Ajeeny, I daangi kïti angø nyë, ni nägi Anywaae ki mar adape wal ki mar nyïïa muc en. Wa reba I dak kimar di gööp dëër en ni rii ba caani na kare en?
Wøp nø, I tïmi ni käla kaa møn, ni ïïno öö powa Anywaa ka nga dikwøng? Caan dëëri keeri , kany poode ni kunhnha Anywaa poot kari them piny bäre en.
Kwar u ee anga,wangu anga? Kwaru  o bëëdö ni tïïya ngø powa Anywaa cøn? Caan leere mo kwaru jï wa nee wïny wa ki wäät wa mo poot kari loomø en.

Ni näk mo ïïna acïeni winynaam, wal acïeni winy lul can dëëri, nee ïïna gwïëth can dëëri thuwø.  Ba kwaru mana thøw na gwïëdhø wal na cien jiy anga cøn thøw?
Ajeeny, Ajeeny, ni cwøl nyingngi dëël øya piny , ni cwøl nyingngi dëël  ngiira piny.
Ba røk poot di jieø ki per luumi, kaat cïththa I tele pöön ki per waac moi, wääta kate di gööyø  ki nyingngi.Nyï mïëë  männö ki per rääö mari ki tïï keeth jiy mana käl ri kwar u . Kiper buuk mari, parlama mari  ii daa bang jøw näk geera ïth ge.
Angø nye I raanyi powAnywaa ni rii ba nyoothi na kare ngø? Ki do jïëmø cøn kiper paagi thööth .Ni ïïna winy tiergool, winy lul, winyo pëënø.

Ajeeny, nii näk mo gïn tïïyï acaara mara Anywaa ni ngec, ni ba kunynyi en, ni käla ri pï naam be, ado köö na Anywaae do mädhø ki pï køth; Ni näk bee mo ïïni gïn bëëdë na acaara mar Anywwa I tïïø ni beer ni ba pïï I tar en nee per na cami kul ku othuri ni ba but I buur mo cøl, ado köö ni cämi ki ring diel ki dhieng wal anger. Gïn lwiiny wïï piny en näk per mana maathi pï iith, ado köö ni mädhi ki pïïa acirööy.

Ba ïïni, ajeeny, ïïni møn ee, ni ïïna nga? Caan dëëri. Ni näk mo I ba käl naam, I ba kAl lul, ki jïra wän ni käla ri cam.
Öö ,kare møn, nägi käla ro odëëna kany mør kare! Kiper odëëna ngääe otal ni pøøth ni yie otuunyö ka acaare mo thööth mo bung dwal røk yie. Nii tøør ro odëëna kany mør I käla ri ambaaca ni näk tuge adäk ni røki ba dwal ge ni ngati man cäätha kur keere.
Nyë Ajeeny, waana thøw ki paar. Ï e ï kali kaa møn, ni dïïri wï Anywaa en??aan dëëri keeri.
Ajeeny ïïno öö ni cura kaa wï ngöömø nyë- ni kieri with dhøk uudi en, ki bäät näm, ki I lul bare? Ajeeny, ni wa thuunthnha ïïni, Anywaa thøw dï cängi,Anywaa di twuö di øø. Ajeeny ïïna täwa ngø ni ngaap ki ïïni leth døc en nyë-caan dëëri bø.
Ajeeny ki man nägi wa en, mïn ec mari ba joot thuwø en e, ni gïna nängi Anywaa kipere nee ngäc.
Ajeeny, potwa näk na wøp, ba kany ojootwa ï yie, ï näk wa nääö, nee time ni döönga paae moi, ni köödhi mooi ge cwøl ni nyimara jeeny.
Jø poAnywaa manya beet mëër ba ki køøra ajeeny beet mëër adhäthø.
Ki raadïëri møn ngääö ni kwääri moø, ki jø okøp røkge ni gena jø athibeli ko okwödi moge mo näk røkge da cwaak kwär bëët mëër raanyage dï poAnywaa.
Nyë Ajeeny, mëër ba joot ki rii. Ajeeny bee ïïni otïïc kwääri mowa ni geera ïthge nee døønge. Do nää gwet ajeeny moa atude ocïbø jï poAnywaa-Bëët mëër do joodø.
Nyë Ajeeny I kwacwakwaö ni rii daagi poAnywaa. Ï ni tïïc tïï näk jiy en. Dëëri e ba juuy bare? Anywaa araanyi. Ba nyingngi ngäc ni kaa kali yie kuc.

Ajeeny, Ajeeny,Ajeeny, nyë winylul,nyë winytiergool, nyë winypwöla,nyë winyopëënø,wïnyø jïri, potwa näk na wøp, ba kany ojootwa ïïni ki nyï kwaayi bëët yie, I näk wa nääö, nee tïme ni döönga paae moi. Ni köödhi moi cwøl ni gena nyïkwaac Ajeeny.
Ba paagi gïn tïïyï en ba ngwaale? Nyë ajeeny, kee do theemma dwal røk ni jiy tïmge ni jeenya ïïni!!!

Kanya dhïërwa waana köö kany mør thiinh a göör mar jøw. Kanya dhïërwa , waana köö ni per keethø ri nying jammi. Kanya dhïërwa, waana köö ni per dhøk man akwany øtgöör ki øt thaji (ogööli). Ba na dwalwa røk wa na can dhøk juure moa keeth poAnywaa ajenny atïmø ni mare lørø.

Angø nyë, Ajeeny, waana ööl Wiiwa karwa-ni wa thöör nyimänni mo nyooth røk ge kanyo kath wïï nii jeenyawa. Näk cirri cïpïcïbø opeeri poAnywaa piny , I pwøcwa pwø ki wäätwa.
Ba kanyu kweeri yie Jwøk kwacwa kwaaø ni lam marwa wïnyë ni tïmi ni tøør poAnywaa.
Ba ennø këël kanyu tïmi ni tøør, I jeenywa jeenyø ki ma cooci moi bëët këël kanyu kuny jwøki poAnywaa.

Ngat Agöör gø: Puurrö Nyigööni Caam
Imeel:
South Sudan