Angø jaay, ngøøm ka cam noo nït?
Abung cwøw ee wal kadha jäk?
Jur ka nyänhnhø wang keew okaal gø
Ocöör Anywaa wøk ki mar thwöl mo jar töök kal.

O koorø ngø ni poot cwøw i ni ba jalli en?
A bee nyäk paac ji Lul ko Opëënø ee wal canna otëë mo Gambëëla?
Jaay, othwønh thøaa poge!! Jaay, othwønh thøøa raa dïëri ...Othwønh thøw nyïm poge ni thuunhnha adïëdi.
Jaay, ngat many kwär ni kare bäär ni tuungge bung ngøøm jïge ee, anga?
Paac kur nyägi ni da jø po dwøng ki jø po thiinh mo keethø.
Näk nyaäänga Opëënø be, Lul thum naa pøtte,
Näk nyäänga Lul be, Opëënø tal na leela
Jaay, Öö maal ocømø cwïny øøni ni paac gwøk kany poode ni cwøw kur thum en.
Näk oteeø mar Gambëëla poot kwøw, pëënyu, O cwago gø ka caara.
Näk oteeø mar Gambëëla ena wøk i jur mør, cwagu oduugø paac ocïp remme nji mo onywøl Anywaae i nyïm.
Näk oteeø mar Gambëëla bee Gääla na göör ciik piny Gambëëla, Këël omeer wal tïïya ataa, parru wïë ni ciik abøth.
Jaay, cwøw ki wøp ba jïëm....
Jaay, cwøw ki göör ki kwär ba jiem...
Jaay, kwany dhi jur mør ki cøøt jur mør ba jiem....
Jaay,nee da ngat mo jøw orööpø gø ni pogi oräänyø ni raanya gwöki ki päl cwiny..
Gïnø gø kur nwöyø Gambëëla na kïïn täw mar juuc Ithoopieya ice..
Eni e, Obujølle okakka kaa , na wää akupe ni nyigi jook ri tiel?
Ki jïra nee paa thinnhnhø raa bee, bee Gambëëla ojek jiy mo path.
Ba eeni e jay, paac ee gïre kuyu?
Kee aana köö be, ni göör ki kwär ki cøøt mään mo path ki cam odëëna ji ba jieme.
Paac bee eni ongør tungi ki paae...Anywaae ge paa ri ngwøp ge..Nyingge caa ri ngwøøpge..
Ba kany otïme ni ngwøøm bungge ji jiy wï jur tïmø ni kuc ,køøre ba wør këët...
Paac mo yie bung oteeø bäät ngøøm ba WØR!!! Gïn manya ngäc na wøp jï jiy bëët ko obala kuu war thøw.
Dhaanhø be mo ocwääc jwøki bäät piny, poge dagø mo jiema ree.
Øøni ee, Ø jïëmø ri pane këët ni näk Anywaa cïba cer kwen kwen?
Gïn tägi en e, abung oteeø eee, wal cøødha røk wøk ni nyäga paac?
Noo köö bungngö otëë, odi jääl jwøki..
Ni näk nyäga paac wal cwøw ngeew ki tööt, otëë tïmø ni onyimwøny.
Ba näk gïn tïïc en cwøw ki teek cwiny owiilø ki tööt ki ngeew dëël,
Nyë, nyimera kany otïme ni rem Anywaa rää rii ki tøønga nägø gø ker dee ngat leew dhee.

Ngat Göör gø: Puurrö Nyigööni Caam
Email:
Ki Juba, Republic of South Sudan