Angø jøw okøøe ka lem, køøre giille ojiemi

Angø jaay,Giile atïmø nee bee otëë ge paac køør rem jaay

Okøøe jiye paa dhiingu, giille jiye näga dhiingu

Ni mwöy naa bäc ba mwöc no køøk,ni nyøøi na nyøøe ba dheeth

Ni leengi naam ba thari ba ngiire piny. Ni tïëtti ki wïc pïël dhaanhø ni kwën ki gø

Ni gadhi gäba gwete ba bo?p.

Giille ni tiengi na jääy ba thari ,ba ngiira piny tiet pïï.

Ni koonyi piny na jaath øtø ba cwän Obängngi. Ni cï nyïm tøng bang mäny-kare ba joot ba manyi ka buul kiper ba ngec ki dhieng iluum. Giille ne cege kar buul paage rwäänyø jïre-opeeri nyïä kuuë piny.

Ni nyør ngøøm tiete ba leppe kiper mo nyïm kuëë.

Angø jaay, Giille køp na ajiem gøøp dëër awiilge ka amwøla maac nïdi nø?!

Jaay cwøw, Giille ka pot cuum døøc køøre-Okøøe okoodhi wøk ka mar beek ruuth.

Omanyøngø këët nø, ni näk mo giille ge pängngø pängngø ka agwaaga i pëëta en ji okøøe, omëëg ge Otägø dï këët en køør rem jaay?!

Agiille moe këët en-Giille moa wääre na köö ni kwön-Anywaa raac-Ocaamge jøw koodëëne ka araapraapi..Giille moa köö ni nyïïa kuk Anywaae reyø, na øøm Oremø gäba no daabø…

Giille moa näk akooma kuc ge na bëëdö nige cämø cuuk.

Giille moa lam jwø Lul ko Opëënø-ni løøga tiet adïël..Giille moa kaang lul na luul køør rem jaay.

Giille moa pet Opëënø naa pøtte køør rem jaay….

Ka løny ka köö Anywaae ni tääng dee døø dwaar,,,Ba täga ri remø mo tøønna raa Anywaa.Amannø ni tøønna raa Anywaa en ni ööy ki køøt giille ni løømma okøøe paac en, ni dööng giille na liil.

Nyë lwaa Giille pot gïri loom na wøp i pïëni manø no nyool thari ki teek enø køør rem jaay; obëëde ni rangi rangø i-gø, kiper gïna tïïc ngatta cuum ïïni ri nyïmeru mo näk okøøe tøønga rëëmö gø poot kar rääö ri kal.

Giille manø maru nø—nee pïënu cööda wøk thääthu uunu orööp yodweel ko okøøe…ba par wïc leth kiper enø Giille tïmø ni kïëe okweerge...këël kany ogït cwøwyi ko okøøe mo mwöc ni Po Anywaa nee rapge køør ceng Giille ni cøl døøc ece-øøi.

Ngat Göör gø: Puurrö Nyigööni Caam
I-meel: ajwara_puro@yahoo.com
Ki Juba, Republic of South Sudan